Першая экспазiцыя этнаграфіі пачала працаваць у музеі Пiнску больш за 20 гадоў таму – у 1996 годзе. З цягам часу фонды папаўняліся новымі матэрыяламі i надыйшоў час яе пашырыць. Увесь снежань супрацоўнікі плённа працавалі над аднаўленнем цэнтральнай музейнай выставы і 1 лютага ўрачыста адкрылі яе для наведвальнiкаў.
На адноўленай экспазіцыі аматары гiсторыi i этнаграфіі маюць магчымасць на ўласныя вочы пабачыць, як жылi палешукi стагоддзi таму i чым яны займалiся. Хата i яе простае ўбранне, дзiцячая калыска, бабiн кут, прылады побыту – усё гэта знайшло сваё месца на выставе.
Тут таксама можна даведацца, якім быў паўсядзёны і святочны строй палешукоў. Адна з яго адметнасцей – жаночая намітка, якая пазней змянілася хусткай. Насілі наміткі да пачатку, а ў некаторых раёнах і да сярэдзіны XX стагоддзя. Завязвалася яна, мiж iншым, даволі мудрагеліста.
Прадстаўлены прадметы ганчарства – збанкі і глечыкі з Гарадной і Пагост-Загародская чорная кераміка. Больш разнастайна паказаны адзiн з галоўных народных промыслаў – рыбаводства. Значна дапоўнілі экспазіцыю прадметы пчалярства і бортніцтва – традыцыйную з XVI стагоддзя для палешука справу.
Сваю ролю ў аднаўленнi выставы адыграла і звычайная перастаноўка тэматычных экспанатаў. Зараз, здаецца, нават даўні і знакаміты пінскі ровар выглядае больш эфектна.
