Дзень роднай мовы, які па рашэнню ЮНЭСКА адзначаецца 21 лютага, адзначылi культурна-выхаваўчымi мерапрыемстваi навучальныя ўстановы па ўсёй Беларусі. Этнаграфічны тэатралізаваны ўрок правялі і ў Пінкавічах.
17 гадоў таму з мэтай захавання знікаючых моў сусветная супольнасць абвясціла дзень роднай мовы – каб хоць аднойчы на год на ёй гаварылі, пра яе ўспаміналі. Нягледзячы на тое, што беларуская мова з´яўляецца адной з дзяржаўных i вывучаецца ў навучальных установах усiх узроўняў, але у побыту жыхары нашай краiны ёй карыстаюцца зусiм няшмат.
Кожны настаўнік роднай мовы i лiтаратуры сёння намагаецца заахвоціць маладое пакаленне размаўляць па-беларуску. На этнаграфічным занятку ў Пінкавічскай сярэдняй школе імя Я. Коласа вучнi не толькi размаўлялi на роднай мове – тут на ёй вядзецца ўвогуле навучанне, але i дэманстравалi нацыянальную вопратку жыхароў сваёй вёскі Пінкавічы. Яны чыталi вершы беларускіх класікаў і спявалi народныя песні на яскравай палесскай гаворцы.
Своеасаблівай візітоўкай Палескага рэгіёна лiчыцца трасянка, на якой размаўляюць мясцовыя жыхары, асаблiва сталага ўзросту. Але любая мова, якую мы чуем сёння, – сучасная літаратурная, змешаная трасянка, ці мясцовы дыялект – усе гэта родная беларуская мова. І менавіта яна, ва ўсіх сваіх варыяцыях, паказвае спрадвечнасць беларусаў на сваёй зямлі.
Анастасiя Наздрына
